
马尔巴大师教言集MARPA7ཏཻ་ལོ་པའི་རྣམ་ཐར་དང་གསུང་མགུར།
1-1-46a
༄༅། །ཏཻ་ལོ་པའི་རྣམ་ཐར་དང་གསུང་མགུར།
༄། །ཏཻ་ལོ་ཤེས་རབ་བཟང་པོའི་རྣམ་ཐར་མདོར་བསྡུས་ཚིགས་བཅད་མ།
དཔལ་བདེ་མཆོག་འཁོར་ལོ་ལ་ཕྱག་འཚལ་ལོ། །སངས་རྒྱས་ཀུན་གྱི་བདག་ཉིད་རྡོ་རྗེ་འཆང་། །བྱང་ཆུབ་སེམས་དཔའ་རྡོ་རྗེ་སྙིང་པོ་དང་། །དབྱེར་མེད་རྣལ་འབྱོར་དབང་ཕྱུག་ཏེ་ལོ་པ། །ཤར་ཕྱོགས་ཟ་ཧོར་ཡུལ་དུ་སྐུ་འཁྲུངས་ཏེ། །ཏིལ་བརྡུངས་ལས་ལ་བརྩོན་པས་གཉིས་མེད་ཀྱི། །ཡེ་ཤེས་དངོས་པོའི་གནས་ལུགས་རྟོགས་པ་ཡིས། །ཟ་ཧོར་ཡུལ་ཕྱོགས་ལན་གསུམ་དུ། །སྟོང་པར་བྱེད་པའི་སྤྲུལ་པ་རྡོ་རྗེའི་སྐུ། །ནུབ་ཕྱོགས་ཨུ་བརྒྱན་ཡུལ་དུ་བྱོན་ནས་ཀྱང་། །དྷརྨ་གྷ་ཛྷ་གསང་བའི་གྷ་དྷོ་ལིར། །ཕྱི་ནང་གསང་བའི་མཁའ་འགྲོ་རྣམ་གསུམ་ལ། །གསང་བ་དྲི་མེད་གདམས་པ་རྣམ་གསུམ་དང་། །ཆོས་ཉིད་སྟོན་པ་བརྒྱུད་དོན་མཐའ་དག་ཞུས། །དངོས་གྲུབ་ཐོབ་ནས་གདུལ་བྱའི་དོན་དུ་བྱོན། །ལུས་མེད་གདམས་པ་ཁོང་དུ་ཆུད་ནས་ནི། །ཕྱི་རབས་དོན་དུ་ངེས་པར་གཞན་དོན་ཕྱིར། །བླ་མ་བསྟེན་ཅིང་བཀའ་བབས་བརྒྱུད་པར་ལྡན། །འདི་དག་གནས་ཀྱི་ངེས་པ་དང་། །དུས་དང་གདུལ་བྱ་ལམ་ལ་
1-1-46b
བཀོད། །རིམ་པ་བཞིན་དུ་བསྟན་པ་ནི། །རྗེ་བཙུན་ཆེན་པོ་ཏེ་ལོ་པས། །གདུལ་བྱའི་གཙོ་བོ་རྣམ་བརྒྱད་བཏུལ། །ནུས་ལྡན་བློ་གྲོས་ཨུ་བརྒྱན་ཡུལ། །རྩ་རླུང་ཡེ་ཤེས་དེ་ཉིད་རང་གྲོལ་ལྡན། །ནག་པོ་དགེ་བ་བསིལ་བའི་ཚལ། །མ་ནོར་ལམ་གྱི་གཟེར་དྲུག་བསྟན། །བླུ་བྱེད་བདེན་སྨྲ་ཧ་ཧ་རྒོད། །སྒྱུ་མ་རྟེན་འབྲེལ་སྙིང་པོ་བསྟན། །ཉི་འོད་སྒྲོན་མ་རྟེན་འབྲེལ་སྙིང་པོ་བསྟན། །ཉི་འོད་སྒྲོན་མ་སོ་སའི་གླིང་། །ལྷན་ཅིག་སྐྱེས་མའི་མངོན་རྟོགས་ཉིད། །ཏིང་འཛིན་བྱང་ཆུབ་དཔལ་གྱི་རི། །དྲི་མེད་བདེ་བའི་ལམ་མཆོག་བསྟན། །མན་ཏྲི་ཛྷ་ན་ར་ལྔ་སྟེ། །ཕྱི་ནང་གསང་བའི་རྒྱུ་འབྲས་བསྟན། །ཉི་ཟླ་ཨ་མི་ཙུན་དྷའི་གླིང་། །རྣམ་རྟོག་རང་དག་མན་ངག་བསྟན། །ལྐུག་པ་དབྱངས་མཁན་ན་ག་རར། །ལྷ་སྒོམ་སྤྱོད་པའི་གདམ་ངག་སྟེ། །སྐལ་ལྡན་དེ་དག་རེ་རེ་ཡང་། །སྐད་ཅིག་ཉིད་ལ་གྲོལ་གྱུར་ཏེ། །འབྱུང་བའི་སྐྱེ་མཆེད་དབང་ཐོབ་ནས། །འཆི་མེད་རྡོ་རྗེའི་སྐུ་ཐོབ་ནས། །འདའ་བ་མེད་པར་བཞུགས་པ་ཡིན། །སྒྱུ་ལུས་སྤྱོད་པ་རྣམ་འགྱུར་ཡང་། །སྣ་ཚོགས་དུ་མར་བསྟོན་(སྟོན་)པ་ནི། །གདུལ་བྱ་སྣ་ཚོགས་དང་བའི་ཕྱིར། །ངེས་པ་མེད་པའི་ཏེ་ལོ་པ། །དཔལ་ལྡན་བདེ་མཆོག་འཁོར་ལོའི། །སྤྲུལ་པར་གྲགས་པའི་དུས་ཚོད་ནི། །ཆུའོ་ས་ལ་ན་ཏ་འམ། །དུ་ལ་ཀེ་ཏ་ཞེས་བྱའི་འགྲམ། །དུ་ལ་ཁ་ཏུ་མྱ་ངན་མེད། །རབ་བྱུང་ཚུལ་གྱིས་བཞུགས་པའི་ཚེ། །དང་པོ་བདེན་པ་མཐོང་དུས་སུ། །རྩ་བའི་སྐུ་ཡིས་འོག་མིན་དུ། །རྡོ་རྗེ་འཆང་ལ་ཆོས་གསན་ཏེ། །རྒྱལ་བ་ཤཱཀྱ་ཐུབ་པ་དང་། །ཀླུ་སྒྲུབ་ཨརྱ་དེ་བ་དང་། །རྡོ་རྗེ་འཆང་དང་ང་གཏམ་བྱས། །ང་ནི་ཞིང་ཁམས་བརྒྱར་ཡང་ཕྱིན། །སྤྲུལ་པ་བྱེ་བ་ཕྲག་བརྒྱ་འབྱུང་། །ས་རབ་དགའ་བ་ངས་ཀྱང་མཐོང་། །རྒྱུ་འབྲས་རྟེན་འབྲེལ་བདེན་པ་མཐོང་། །ས་ར་ཧ་ནི་
1-1-47a
ཆེན་པོས་ཀྱང་། །རྟོགས་པ་ང་ལ་འགྲེན་དུ་མེད། །གྲུབ་ཐོབ་ནམ་མཁའི་མཐར་ཐུག་པས། །བསྟོད་པའི་འོས་སུ་གྱུར་པ་ཡིན། །ཏི་ལོ་བ་ལ་རྟོགས་པ་མེད། །སེམས་ཅན་སྐྱེ་མེད་གནས་སུ་དེངས། །གཟུང་འཛིན་རྟོག་པས་འཆིང་འགྱུར་བས། །དབྱེར་མེད་མཁའ་འགྲོའི་རྫོང་ལ་ལྟོས། །བདེ་མཆོག་དངོས་སུ་གྲགས་པ་ནི། །རྒྱལ་པོ་ཟླ་བསྲུང་གདུལ་བྱ་ལ། །ཧེ་རུ་ཀའི་ཆ་བྱད་ཀྱིས། །རྣམ་ཐར་སྒོ་གསུམ་སྐུ་གསུམ་ཐུགས། །ཤྲི་ཧེ་རུ་ཀར་གྱུར་པ་ཉིད། །རང་བྱུང་སངས་རྒྱས་ཉིད་དུ་བསྟན། །དུས་གསུམ་སངས་རྒྱས་ཕྱོགས་བཅུའི། །དཀྱིལ་འཁོར་ཐ་དད་བསྟན་པ་ན། །རྒྱལ་པོ་མེ་ཏོག་གླིང་པའི་དོན། །སྣ་ཚོགས་དུ་མའི་ལྷ་རུ་སྤྲུལ། །ངའི་ལུས་ནི་ཀྱེའི་རྡོ་རྗེ་ལ། །ངག་ནི་མ་ཧ་མ་ཡ་ཡིན། །སེམས་ནི་འཁོར་ལོ་བདེ་མཆོག་དེ། །དབང་པོ་གསང་བ་འདུས་པ་ཡིན། །ཡན་ལག་དགྲ་རྒྱུད་ནག་པོ་སྟེ། །ཉིན་ལག་རྡོ་རྗེ་འཇིགས་བྱེད་ཡིན། །རྩ་གནས་རྡོ་རྗེ་གདན་བཞི་ལ། །རླུང་གནས་རྡོ་རྗེ་ཕྲེང་བ་ལ། །ཐིག་ལེ་གསང་བ་མཛོད་ཡིན་ཏེ། །གཙུག་ཏོར་སངས་རྒྱས་ཐོད་པ་ཡིན། །ཐམས་ཅད་བདག་ཉིད་དུས་འཁོར་ལོ། །བདེ་ཆེན་སངས་རྒྱས་མཉམ་པར་སྦྱོར། །རང་སེམས་ལྷན་ཅིག་སྐྱེས་པ་ཉིད། །སྐད་ཅིག་དང་པོ་རང་བྱུང་བ། །མ་སྐྱེས་འདས་པའི་སངས་རྒྱས་ཡིན། །སྐད་ཅིག་གཉིས་པ་འགག་པ་མེད། །མ་སྐྱེས་མ་བྱོན་སངས་རྒྱས་ཡིན། །སྐད་ཅིག་གསུམ་པ་ལྷུན་གྱིས་གྲུབ། །སྐྱེ་མེད་ད་ལྟར་སངས་རྒྱས་ཡིན། །བ་སྤུ་ཞིང་ཁམས་དཔག་མེད་ཀྱི། །དེ་དག་དུས་གསུམ་སངས་རྒྱས་ཀྱི། །སྐུ་གསུང་ཐུགས་དང་དབྱེར་མེད་ཡིན། །བདག་ཉིད་ཆེན་པོ་ཅིག་ཉིད་ནི། །སངས་རྒྱས་དུ་མར་སངས་རྒྱས་དང་། །སངས་རྒྱས་དུ་མ་སྣ་ཚོགས་པ། །བདག་ཉིད་ཅིག་ཏུ་སངས་རྒྱས་པའོ། །མི་
1-1-47b
བརྗེད་གཟུངས་ཐོབ་དཔལ་ལྡན་ན་རོ་དང་། །བདེ་ཆེན་ཡེ་ཤེས་དོན་ལྡན་ཀ་སོ་རི། །སྣང་བ་ལམ་དུ་བསླངས་པའི་རི་རི་པ། །མཆོག་གི་སློབ་མ་རྣམས་གསུམ་གདུལ་བྱ་སྟེ། ཀྱེ་ཧོ་འདི་ནི་རང་རིག་ཏེ། །འདི་ནི་བྱིན་རླབས་རིམ་པ་བླ་ན་མེད། །ཏེ་ལོ་ང་ཡིས་ཅི་ཡང་བསྟན་པ་མེད། །རང་རིག་ཉིད་ལ་མཚོན་ཏེ་ཤེས་པར་བྱོས། །ནུས་ལྡན་བློ་གྲོས་ཨུ་བརྒྱན་ཡུལ་དུ་བརྟུལ། །དེ་ལ་སྤྱོད་པ་མཐུའ་སྟོབས་ཆེ་ཞེས་གྲགས། །ནག་པོ་དགེ་བ་བསིལ་བའི་ཚལ་དུའོ། །ནག་པོ་ཀ་མ་ལ་ཞེས་གྲགས་པའོ། །བདེན་པ་སྨྲ་བར་ཧ་ཧར་རྒོད། །ཀོ་ག་ལི་པ་ཞེས་བྱའོ། །ཆང་འཚོང་སོ་སའི་གླིང་དུ་སྟེ། །རྣལ་འབྱོར་མ་ནི་གང་གྷའོ། །སྔོན་པ་དཔལ་གྱི་རི་འདབ་དུ(ཏུ)། །གྷུ་ན་ས་ཀ་ར་ཞེས་པའོ། །མན་ཏྲི་ཛྙ་ན་ར་ལྔ་སྟེ། །གཅེར་བུ་ལྷུང་བཟེད་འཛིན་པར་གྱུར། །ཉི་ཟླ་ཨ་མི་ཙུ་ཏའི་གླིང་། །ཉི་མ་སྦས་པའི་ཟླ་བ་སྦས། །ན་ག་རར་ནི་གླུ་མཁན་པ། །མདུང་ཅན་ལྐུག་པ་ཞེས་བྱར་གྲགས། །འདི་དག་གདུལ་བྱའི་གཙོ་བོ་སྟེ། །སྙན་རྒྱུད་གདམས་པས་སྨིན་ཅིང་གྲོལ། །རྣལ་འབྱོར་དབང་ཕྱུག་བརྒྱད་པོ་འདི། །ངེས་པ་རྡོ་རྗེའི་སྐུ་ཐོབ་པའོ། །རྗེ་བཙུན་ཏེ་ལོ་ཆེན་པོ་ལ། །ལུས་མེད་མཁའ་འགྲོས་གདམས་པ་ནི། །སྤྱོད་པ་ཆུ་ལ་རལ་གྲི་རྒྱོབ། །དམ་ཚིག་རང་སེམས་མེ་ལོང་ལྟོས། །དམ་རྫས་རྟོགས་པའི་ཉི་མ་འདི། །སྨིན་གྲོལ་སེམས་ཀྱི་རྒྱ་མདུད་ཁྲོལ། །རང་སེམས་ཕྱག་རྒྱ་ཆེན་པོ་ལྟོས། །རྩ་རླུང་དྲ་བ་འཁོར་ལོ་བསྐོར། །རིག་པ་ཡེ་ཤེས་སྒྲོན་མེ་སྦོར། །རོ་སྙོམས་ཕྱིའི་མེ་ལོང་ལྟོས། །བདེ་ཆེན་གསུང་གི་རིན་ཆེན་ཆོངས། །གསང་བ་དྲི་མེད་མཁའ་འགྲོ་མས། །བརྡ་དོན་བསྟན་པ་རྡོ་རྗེའི་ཚིག །གསུངས་པས་མ་འོངས་སྐལ་ལྡན་དོན། །ཡེ་ཤེས་ཆེན་པོ་རྟོགས་གྱུར་པའོ། །རྗེ་བཙུན་ཆེན་པོ་ཏཻ་ལོ་པ་ཤེས་རབ་བཟང་པོའི་རྣམ་པར་
1-1-48a
ཐར་པ་མདོར་བསྡུས་པའོ། །
༄། །ནུས་ལྡན་བཏུལ་བའི་ཡོན་ཏན།
ལྷན་ཅིག་སྐྱེས་མ་ལ་ཕྱག་འཚལ་ལོ། །བླ་མ་རིན་པོ་ཆེ་ལ་ཕྱག་འཚལ་ལོ། །ནུས་ལྡན་བརྟུལ་བའི་ཡོན་ཏན་ནི། །བདེ་ལ་བརྟེན་པའི་རྩ་རླུང་སྦྱངས་གྱུར་པས། །རྣ་བ་ཐོགས་མེད་མངོན་ཤེས་རྫུ་འཕྲུལ་སོགས། །མཁས་འདུས་ཤིང་ལྷའི་དཀྱིལ་འཁོར་ཞེན་པ་ཡིས། །དོན་དམ་སྙུག་མའི་གནས་ལུགས་རྟོགས་མི་འགྱུར། །གནས་ལུགས་རྟོགས་པར་འདོད་པའི་རྣལ་འབྱོར་པ། །རླུང་བཅིངས་ལ་སོགས་ལྟ་བའི་རྒྱ་མདུད་དེ། །ཞེན་མེད་སྙུག་མའི་ངང་དུ་རང་སར་གྲོལ། །བདེ་ཆེན་འབད་བརྩོལ་(རྩོལ་)མེད་པ་ངང་གིས་འབྱུང་། །འཁོར་དང་མྱ་ངན་འདས་པའི། །སྤང་བྱ་གཉེན་པོའི་ཆོས་རྣམས་ཀུན། །རང་གི་སེམས་སུ་འདུས་པས་ནི། །དེ་ཕྱིར་རང་སེམས་བསྒོམ་པར་བྱ། །བསྒོམ་པའི་ཚེ་ན་ཅི་ཡང་བསྒོམ་དུ་མེད། །བསྒོམ་དུ་མེད་པས་མི་བསྒོམ་དབང་མེད་པ། །སྙུག་མ་ལྷན་ཅིག་སྐྱེས་པའི་ཡེ་ཤེས་ནི། །བདག་དང་གཞན་དོན་འབྲས་བུ་ཕུན་སུམ་ཚོགས། །ཏེ་ལོ་ང་ཡིས་ཅི་ཡང་བསྟན་དུ་མེད། །ནུས་ལྡན་བློ་གྲོས་ཨུ་བརྒྱན་དུའོ།། །།
༄། །ནག་པོ་དགེ་བ་ལ་གདམས་པ།
སློབ་དཔོན་ཆེན་པོ་ཏེ་ལོ་པས་རྣལ་འབྱོར་པ་ནག་པོ་དགེ་བ་ལ་གདམས་པ། ལས་དང་རྣལ་འབྱོར་རྟེན་འབྲེལ་གྱིས། །མི་རྟག་འཁོར་བའི་ཉེས་དམིགས་དྲན། །ཡང་དག་ལམ་དུ་ཞུགས་པ་ལ། །གཟེར་དྲུག་གནད་ཀྱི་གདམས་པ་དགོས། །ཅེས་པ་དེ་ལ་གཟེར་དྲུག་ལ། གསོལ་བ་འདེབས་པར་བྱེད་པ་ལ། དང་པོ་སྐྱབས་འགྲོ་བྱིན་བརླབས་ཀྱི་གཟེར། རིག་པ་སྲངས་སུ་འཛུད་པར་བྱེད་པ་ལ། སྲོག་རྩོལ་གནད་ཀྱི་གཟེར། གནས་ལུགས་རྟོགས་པར་བྱེད་པ་ལ་སྙུག་(གཉུག་)མ་ངོ་སྤྲོད་ཀྱི་གཟེར། དེ་ཉིད་ཉམས་སུ་བླངས་པས། ཉམས་མྱོང་རྟགས་ཀྱི་གཟེར། མྱུར་དུ་སངས་རྒྱས་པར་འདོད་པས་འཕོ་བ་གནད་ཀྱི་གཟེར། བེམ་རིག་འབྲལ་
1-1-48b
བའི་དུས་སུ་འཆི་ཀར་ཡེ་ཤེས་ཀྱི་གཟེར་དང་དྲུག་གོ། །དང་པོ་ལ་གསུམ་སྟེ་སྔོན་འགྲོ་རྟེན་བསྐྱེད་པ་དང་། དངོས་གཞི་སྐྱབས་སུ་འགྲོ་བ་དང་། རྗེས་གནས་ལུགས་ལ་བློ་བཞག་པའོ། །སྔོན་འགྲོ་བརྟེན་(རྟེན་)བསྐྱེད་པ་ལ་རང་ཐ་མལ་དུ་བསྟན་བདེ་བ་ལ་འདུག་ཏེ(སྟེ)། བྱང་ཆུབ་ཀྱི་སེམས་དྲན་པའི་སྒོ་ནས་རང་གི་སྤྱི་བོའི་སྟེང་མདུན་གྱི་ནམ་མཁའི་འདོམ་གང་ཙམ་དུ། རྒྱུ་རིན་ཆེན་སྣ་ཚོགས་ལས་གྲུབ་པའི་ཁྲི་དང་། དེའི་སྟེང་དུ་སྣ་ཚོགས་པདྨ་འདབ་མ་སྟོང་དང་ལྡན་པ་ཅིག་བསམ། དེའི་དབུས་ཀྱི་ལྟེ་བ་ལ་ཡི་དམ་གྱི་ལྷ་ཇོ་མོ་རྣལ་འབྱོར་མ་ལྷན་ཅིག་སྐྱེས་མ། སྣང་ལ་རང་བཞིན་མེད་པ་བསམ། དེའི་དབུའི་སྟེང་ཁྲུ་གང་ཙམ་དུ་པདྨ་འདབ་མ་བཞི་པའི་ལྟེ་བ་ལ་སེང་གེའི་ཁྲི་ཉི་ཟླ་དང་བཅས་པ་ལ་དེའི་སྟེང་དུ་རང་གི་རྩ་བའི་བླ་མ་བསམ། དེའི་སྟེང་དུ་པདྨ་འདབ་བཞི་ལྟེ་བ་དང་བཅས་པ་ལ་བདེ་མཆོག་གསང་བ་རིན་པོ་ཆེ་ཡབ་ཡུམ་བསམ། དེ་རྣམས་ཀྱི་ཐུགས་ཁར་ཟླ་བའི་དཀྱིལ་འཁོར་སྟེང་དུ་ཨོཾ་བཾ་དང་ཧཱུྃ་ལ་སྔགས་ཀྱིས་བསྐོར་བར་བསམ། བར་སྣང་གི་པདྨའི་འདབ་མ་ལ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་སྤྲིན་ཕུང་གི་སྟིབས་(གཏིབ་)པ་བཞིན་དུ་བསམ། རྗེ་བཙུན་མའི་ཕྱོགས་བཞིར་རིགས་ཀྱི་མཁའ་འགྲོ་མ་བཞི། བླ་མའི་ཕྱོགས་བཞིར་ཙརྱ་པ། ཀླུ་གྲུབ་(སྒྲུབ་)ལྭ་བ་པ། སྐལ་བ་བཟང་མོ་དང་བཞི་བསམ། ལྷན་ཅིག་སྐྱེས་པའི་ཕྱོགས་བཞིར་མཁའ་འགྲོ་མ་བཞི་བསམ་པར་བྱ། དེ་རྣམས་ཀྱང་རྒྱན་ཆ་ལུགས་དང་ལྡན་པ་སྣང་ལ་རང་བཞིན་མེད་པའི་སྐུ་ནམ་མཁའི་འཇའ་ཚོན་ལྟ་བུའོ། །དེ་ནི་རྟེན་བསྐྱེད་པའོ། །སྐྱབས་སུ་འགྲོ་བ་ལ་བདག་དང་སེམས་ཅན་ཐམས་ཅད་དུས་འདི་ནས་བཟུང་ནས། སྙུག་(གཉུག་)མ་ལྷན་ཅིག་སྐྱེས་པའི་ཡེ་ཤེས་ཀྱི་རྟོགས་པ་
1-1-49a
མཐར་མ་ཕྱིན་གྱི་བར་དུ་བླ་མ་ཡི་དམ་མཁའ་འགྲོ་གསུམ་ལ་སྐྱབས་སུ་མཆིའོ། །སངས་རྒྱས་ཆོས་དང་དགེ་འདུན་གསུམ་ལ་སྐྱབས་སུ་མཆིའོ། །ཞེས་ངག་ཏུ་ཅི་རིགས་པར་བྱའོ། །དེ་ནས་རང་གི་བམ་དང་སྔགས་ལ་འོད་ཟེར་འཕྲོས་པས། རྗེ་བཙུན་མའི་ཐུགས་ཁར་ཕོག །དེ་ལས་འོད་ཟེར་འཕྲོས་པས་བདེ་མཆོག་ལྷན་ཅིག་སྐྱེས་པ་ཡབ་ཡུམ་གྱི་ཐུགས་ཁར་ཕོག་པས། ཡབ་ཡུམ་གཉིས་པོ་ལས་བདུད་རྩི་བྱང་ཆུབ་ཀྱི་སེམས་ཀྱི་ཆུ་རྒྱུན་བབ་པས་བླ་མ་ལ་ཕོག །དེ་ལས་བབ་པས་ཡི་དམ་གྱི་ལྷ་ལ། དེ་ལས་བབ་པས་སྤྱི་བོར་བབ་ཕྱི་ན་མར་སོང་བས་ཕྱི་ལུས་ཀྱི་སྡིག་སྒྲིབ་དག །ནང་ན་མར་སོང་བས་ནང་སེམས་ཀྱི་སྒྲིབ་པ་སངས་ཀྱིས་དག་པར་བསམ། དེའི་ངང་ལས་རང་ཡི་དམ་གྱི་ལྷ་དཔལ་རྡོ་རྗེ་རྣལ་འབྱོར་མ། ཉམས་མྱོང་མཚན་ཉིད་གསུམ་ལྡན་དུ་བཀྲ་ལམ་གྱིས་བསམ། ལྷ་སྐུ་སྣང་ལ་རང་བཞིན་མེད་པ་ལ་ངོ་སྤྲོད་པ་དང་། བུམ་པའི་དབང་ལ་ངོ་སྤྲད་པའོ། །དེ་ནས་རྡོ་རྗེའི་བཟླས་པ་ནི། དེའི་ངང་ལས་སྤྱི་བོར་ཨོཾཱ། མགྲིན་པར་ཨ། སྙིང་ཁར་ཧཱུྃ་བསམས་པའི་ངང་ལས་ཧཱུྃ་ཅི་རིགས་པར་བགྲང་ཞིང་ཧཱུྃ་ལ་འོད་ཟེར་འཕྲོས་པས་ཡི་དམ་ལྷའི་ཐུགས་ཁར་ཕོག །དེ་ལ་འོད་འཕྲོས་པས་བླ་མའི་ཐུགས་ཁར་ཕོག །དེ་ལས་འོད་འཕྲོས་པས་བདེ་མཆོག་ཡབ་ཡུམ་ལ་ཕོག །དེ་ལ་ཕྱི་ནང་གསང་བ་གསུམ་གྱི་མཆོད་པས་མཆོད། ཕྱིའི་མཆོད་པ་ལྔ། ནང་ཤ་ལྔ་བདུད་རྩི་ལྔ། གསང་བ་ཟག་མེད་ཀྱི་བདེ་བ་གསུམ་གྱི་མཆོད། དེ་ནས་འོད་ཟེར་འཕྲོས། ཡབ་གྱི་ཐུགས་ཁ་ན་ཧཱུྃ། ཡུམ་གྱི་ཐུགས་ཁ་ན་བམ། དེ་གཉིས་ལས་འཕྲོས་པས་ཡབ་ཡུམ་གཉིས་སྙོམས་པར་ཞུགས་ཤིང་སྐྱོད་པས་རྡོ་རྗེ་དང་པདྨ་གཉིས་བསྲུབས་པ་
1-1-49b
དང་སྦྱོར་མཚམས་ནས་བདུད་རྩི་བྱུང་བ་སེམས་ཀྱི་ཆུ་རྒྱུན། རང་གི་ལྕེ་ཐོག་ཏུ་སི་ལི་ལི་བབ་ཅིང་བརྒྱུད་པས་རང་གི་རྩ་བོ་ཆེ་དང་རྩ་བྲན་ཐམས་ཅད་ཁེངས་པས་ཟག་མེད་ཀྱི་བདེ་བར་སི་ལི་ལི་བསམ། དེའི་ངོ་བོ་གསང་དབང་ངོ་། །བདེ་བ་དང་སྟོང་པ་གཉིས་སུ་མེད་པ་ལ་ངོ་སྤྲད་པ་དེ་ཤེས་རབ་ཡེ་ཤེས་ཀྱི་དབང་ངོ་། །རྗེས་གནས་ལུགས་ལ་བློ་བཞག་པ་ནི། རྣམ་པར་སྣང་མཛད་ཀྱི་ཆོས་དྲུག་གོ། །འགྱུར་བ་རླུང་གི་གནད་ལ་རླུང་རང་སོར་བཞག །སེམས་ཀྱི་གནད་སེམས་མ་བཅོས་པར་བཞག་གོ། །དེའི་རྒྱུན་གོམས་པ་ལས། དེ་ལ་ཚིག་དབང་རིན་པོ་ཆེ་ཟེར་(གཟེར་)དེ་ནི་སྐྱབས་སུ་འགྲོ་བ་དབང་བཞི་དང་སྦྱར་བའོ། །དེ་ནི་གསོལ་བ་འདེབས་པ། སྐྱབས་འགྲོ་བྱིན་བརླབས་ཀྱི་གཟེར་ཞེས་བྱའོ། །རིག་པ་སྲངས་སུ་འཛུད་པ་ལ་སྲོག་རྩོལ་གནད་ཀྱི་གཟེར་ལ་བདུན། སྐྱེད་པ་སེམས་ཀྱི་གནད། བཅའ་ཐབས་ལུས་ཀྱི་གནད། གནས་པ་རྩའི་གནད། འགྱུ་བ་རླུང་གི་གནད། དམིགས་པ་རྟེན་གྱི་གནད། བཀོད་པ་བྱང་ཆུབ་སེམས་ཀྱི་གནད། ཉམས་མྱོང་རྟགས་ཀྱི་གནད་དོ། །དང་པོ་ནི་བྱམས་སྙིང་རྗེ་བྱང་ཆུབ་ཀྱི་སེམས་དྲན་པའོ། །གཉིས་པ་ནི་རྐང་པ་རེའུ་མིག་ལྟར་བསྣོལ། རྒལ་ཚིགས་བསྲང་། དཔུང་པ་རྐྱང་། ཨོལ་ཀོ་ཨོ་མདུད་མནན། མཉམ་བཞག་ཕྱག་རྒྱ་བཙིར། ཡི་དམ་ལྷ་གསལ་བས་གསུས་པ་བྲང་ལ་གཅར་རོ། །གསུམ་པ་ནི་རྩ་ཨ་བ་འདུ་ཏི་ཡར་ན་སྤྱི་གཙུག་ཚངས་པའི་བུ་ག་ལ་ཟུག །མར་ན་གསང་བའི་རྩེ་ལ་ཟུག །རོ་རྐྱང་གཉིས་ཡར་ན་སྣ་སྒོར་ཟུག་མར་ན་སྤུ་ན་ག་གུའི་མཚམས་སུའོ། །བཞི་པ་རྡུབ་པ། དགང་བ་གཞིལ་བ་བཏང་བ། གློད་པའོ། །ལྔ་པ་ལ་རྩ་གསུམ་འདུས་པའི་མདོ་རུ་མེ་རྒྱ་ཁབ་ཙམ་པ་ལ་སེམས་འཛིན་པའོ། །དྲུག་པ་ནི་མི་ཤིགས་པའི་ཐིག་ལེ་སྟེ། ཕ་ལས་ཐོབ་པའི་སྤྱི་བོ་ནས་
1-1-50a
ཟླ་བ། མ་ལས་ཐོབ་པའི་ཉི་མ་སུམ་མདོ་ན་གསལ། དེ་གཉིས་བདེ་བ་དང་སྟོང་པ་གཉིས་སུ་མེད་པར་གནས་པའོ། །བདུན་པ་ནི་ཉམས་མྱོང་ལ། བདེ་བ་དང་གསལ་བ་དང་མི་རྟོག་པ་རང་འབྱུང་དུ་འཆར་བའོ། །རྟགས་ལ་རྟགས་ལྔ་ཕན་ཡོན་བརྒྱད་ལ་སོགས་པ་རླུང་ལྔ་ཟིན་པའི་རྟགས་ལྔ་འཆར་བའོ། །དེ་ནི་སྲོག་དང་རྩོལ་བའོ། །གནས་ལུགས་རྟོགས་པའི་ངོ་སྤྲོད་ཀྱི་གཟེར་ལ་གསུམ། ཆོས་ཉིད་གཏན་ལ་དབབ་པ་དང་། སེམས་ཉིད་གཏན་ལ་དབབ་པ་དང་། གཉིས་སུ་མེད་པ་སྙུག་མའི་དོན་ལ་བློ་བཞག་པའོ། །ཉམས་མྱོང་རྟགས་ཀྱི་གཟེར་ལ་བདེ་གསལ་མི་རྟོག་པ་རྒྱུན་གྱི་དག་པ་དྲི་མ་མེད་པར་མཐར་ཕྱིན་པའོ། །རྟགས་ལ་མཐའ་བཞི་རང་གྲོལ་ལྟ་བའི་རྟགས། མ་བསྒོམས་སེམས་པ་མེད་པ་སྒོམ་པ། རང་བྱུང་འགག་པ་མེད་པ་སྤྱོད་པ། རང་ཤར་ལྷུན་གྲུབ་འབྲས་བུ་རེ་དོགས་མེད་པའི་རྟགས་སོ། །མྱུར་དུ་འཚང་རྒྱ་བར་འདོད་པས་འཕོ་བ་གནད་ཀྱི་གཟེར་ལ་བཞི། བཅའ་ཐབས་ལུས་ཀྱི་གནད། འཕོ་བ་ཡུལ་གྱི་གནད། གཏད་ཐབས་དམིགས་པའི་གནད་དང་། འགྱུར་བ་རླུང་གི་གནད་དོ། །དང་པོ་ནི་རྣམ་པར་སྣང་མཛད་ཀྱི་ཆོས་དྲུག་གོ། །འཕོ་བ་ཡུལ་གྱི་གནད་ལ། མདུན་གྱི་ནམ་མཁའ་ལ་ཇོ་མོ་རྡོ་རྗེ་རྣལ་འབྱོར་མ་སྣང་ལ་རང་བཞིན་མེད་པ། གཞོན་ཞིང་མཛེས་པ། ལོ་བཅུ་དྲུག་ལོན་པའི་ན་ཚོད་ཅན། ནུ་མ་དང་གསང་གནས་ཚུན་ཆད་གསལ་བ། བརྒྱན་(རྒྱན་)ཆ་ལུགས་དང་ལྡན་པ། དེའི་ཐུགས་ཁ་ན་མེ་ཏོག་པདྨ་ཁ་ཕྱེ་བ་ལྟ་བུའི་ཟེའུ་འབྲུ་ལ་ཡི་གེ་བྃ་དམར་མོ་འབུར་དུ་བསྟོད་པ་ལྟ་བུ་ལ་སྔགས་ཀྱིས་སྐོར་བ་དེ་ནི་འཕོ་བ་ཡུལ་གྱི་གནད་དོ། །གཏད་ཐབས་དམིགས་པའི་གཏད་ལ། རང་གི་རྩ་ཨ་བ་འདུ་ཏི་དེ་ཡར་ན་ཚངས་པའི་བུ་གར་ཟུག །མར་ན་གསང་གནས་ལ་ཟུག །དེ་ཡང་སྦོམ་ཕྲ་མདའ་སྨྱུག་
1-1-50b
ཙམ། སྨྱུག་མ་ལྟ་བུར་བསམ། དེའི་རྩ་སུམ་མདོ་དེར་ཡི་གེ་ཧཱུྃ་ཅིག་བསམ། ཚངས་པའི་བུ་གར་ཀྵུྃ་བསམ་པས་དེ་ཡར་ཕྱེ་ནས་ཡོད་པར་བསམ་པ་ཡིས་སྟེང་རླུང་མནན་འོག་རླུང་ཐེན་ལ་ཧཱུྃ་དེ་རྗེ་བཙུན་མའི་བྷ་ག་ན་ཡར་སོང་སྟེ། ཐུགས་ཁའི་བཾ་ལས་སྟིམས་ཀྱིས་ཐིམ་པར་བསམ། དེའི་ངང་ལས་དཔལ་རྡོ་རྗེ་རྣལ་འབྱོར་མའི་ཐུགས་དང་རང་གི་སེམས་གཉིས་དབྱེར་མེད་དུ་བསམ། དེའི་ངང་ལས་སངས་རྒྱས་པའོ། །བེམ་རིག་བྲལ་བའི་དུས་སུ་འདའ་ཀ་ཡེ་ཤེས་ལ་འདའ་ཀ་ལ་སྣང་བའི་ཐིམ་ཚུལ་དང་། ཡེ་ཤེས་རྟོགས་པའི་འཆར་ཚུལ་དང་། སྐྱེས་བུ་ཇི་ལྟར་འབྱུང་བའོ། །དང་པོ་ལ་འབྱུང་བཞི་ཐིམ་པས་ཕྱི་དབུགས་ཆད་པའི་དུས་སུའོ། །གཉིས་པ་ནི་ནང་དབུགས་ཨེན་ཅིག་མ་ཆད་པའི་དུས་སུ་ཕ་ལས་ཐོབ་པའི་ཐིག་ལེ་དེ་ནི་སྤྱི་བོ་ནས་བསྐྱོད་དོ། །མ་ལས་ཐོབ་པའི་རྩ་གསུམ་མདོམས་ནས་སྐྱོད་དེ་སྙིང་ཁར་གཉིས་འཛོམ་ནས་འོད་གསལ་ཤར་ནས་སངས་རྒྱས་པའོ། །ཡང་སྐྱེས་བུ་གཉིས་ངོ་འཕྲོད་ནས་སངས་རྒྱས་ཀྱི་ཡོན་ཏན་ནམ་རྩལ་ཀ་ཐམས་ཅད་དེར་རྫོགས་ནས་སངས་རྒྱས་པའོ་ཞེས་གསུང་སོ། །དེས་གཟེར་དྲུག་གི་གདམས་པའོ། །ནག་པོ་དགེ་བ་བསིལ་བའི་ཚལ་ན་རྡོ་རྗེའི་སྐུ་ཐོབ་ནས་བཞུགས་སོ། །
༄། །སྒྱུ་མ་མཁན་བཏུལ་བ།
སློབ་དཔོན་ཆེན་པོ་ཏེ་ལོ་པས། སྒྱུ་མ་མཁན་བརྟུལ་བ་ནི་ཀྱེ་སླུ་བྱ་སྒྱུ་མ་མཁན། སྣང་སྲིད་སྒྱུ་མའི་རང་བཞིན་ལ། །དུག་གསུམ་སྒྱུ་མའི་ཞེན་པ་ཐོང་། །ཞེན་མེད་སྒྱུ་མའི་སྙིང་པོ་བསྒོམས། །སྣང་སྲིད་སྒྱུ་མའི་རྣལ་འབྱོར་པ། །སེམས་ཉིད་ནམ་མཁའི་ངང་དུ་ཞོག །འདས་དང་མ་འོངས་བྲལ་བའི། །རང་བྱུང་ལྷན་ཅིག་སྐྱེས་པར་བྱའོ། །ཡང་དག་ཀུན་རྫོབ་རང་བཞིན་ལས། །རྒྱུ་འབྲས་ནམ་མཁའི་ཆོས་ཉིད་ཅན། །མི་གནས་བདེ་བ་ཆེན་པོ་དེ། །དུས་གསུམ་སངས་རྒྱས་དགོངས་པ་ཡིན། །ཡིད་བཞིན་
1-1-51a
ནོར་འདྲའི་དགོས་འདོད་འབྱུང་། །ཏེ་ལོ་ང་ཡིས་ཅི་ཡང་བསྟན་དུ་མེད། །ཅེས་གསུངས་པས། འགྲོ་མགོན་བདུད་རྩིའི་ཆུ་རྒྱུན་འཐུངས་པ་ཡིས། །བླ་མེད་དོན་གྱི་སྙིང་པོ་བདག་གིས་རྟོགས། །འཇའ་ཚོན་ནམ་མཁའ་ནོར་བུ་སེམས་ལ་ཤར། །ད་ནི་སུ་ལ་ཡང་དྲི་བར་མི་བྱའོ། །དབེན་པར་སྨྲ་བ་ཧ་ཧ་རྒོད། །
༄། །ཆང་འཚོང་མ་ལ་གདམས་པ།
སློབ་དཔོན་ཆེན་པོ་ཏེ་ལོ་པས། །ཆང་འཚོང་མ་ལ་གདམས་པ་ནི། །དད་ལྡན་དབང་དང་དམ་ཚིག་དང་། །སྒྲུབ་ལ་བརྩོན་པའི་རྣལ་འབྱོར་པས། །དུར་ཁྲོད་ལ་སོགས་ཉམས་དགའ་བར། །སྟན་བདེ་ལ་འདུག་སེམས་བསྐྱེད། །རང་ལྷར་བསམ་ལ་མ་མ་འོད་ལས། །བླ་མ་དཀྱིལ་འཁོར་སྤྱན་དྲངས་ལ། །ཕྱག་སོགས་ཡན་ལག་བདུན་པ་བྱ། །དེ་རྗེས་སྔགས་འདི་བརྗོད་པར་བྱ། །ཨོཾཱ་སྭ་བྷ་བའི་སྔགས་སོ། །དེའི་ངང་ལས་སྟོང་པར་བསམ། །དེའི་ངང་ལས་ལྷ་མོ་ནི། །ཁམས་གསུམ་རྒྱ་ཆེ་གཞལ་ཡས་ཁང་། །སྐུ་གསུང་ཐུགས་ཀྱི་ངོ་བོར་བསམ། །དེའི་ལྟེ་བར་ཆོས་འབྱུང་བསམ། །གདན་སོགས་རིམ་པས་བསྐྱེད་པར་བྱ། །རོའི་སྙིང་ཁར་རང་སེམས་ནི། །བཾ་ཡིག་དམར་མོ་བསམ་པར་བྱ། །འོད་ཟེར་འཕྲོ་འདུས་ལྷ་བསྐྱེད་དེ། །ཞབས་གཉིས་གར་སྟབས་བརྐྱང་བསྐུམ་བཞུགས། །ཞལ་ཅིག་ཕྱག་གཉིས་སྤྱན་གསུམ་པ། །གཡས་པ་གྲི་གུག་ནམ་མཁར་འཕྱར། །གཡོན་པ་ཐོད་ཁྲག་ཐུགས་ཁར་བཟུང་། །ཁ་ཊྭཱྃ་རིམ་པས་བརྒྱན་ཞིང་མཛེས། །གཅེར་བུ་སྐུ་མདོག་དམར་མོར་བསྒོམ། །གནས་གསུམ་བྱིན་བརླབས་གོ་ཆ་བགོས། །ཡེ་ཤེས་སྟིམ་ལ་དབང་བསྐུར་མཆོད། །སྐྱོ་ན་སྔགས་ཀྱི་འཁོར་ལོ་བསྐོར། །དེ་རྗེས་གཏོར་མའི་འཕྲིན་ལས་བྱ། །རྟེན་ཅན་རྟེན་མེད་རྫོགས་རིམས་བསྒོམས། །ཉི་འོད་སྒྲོན་མ་སོ་སའི་གླིང་དུའོ། །
༄། །རྔོན་པ་ཛྷི་ན་ལ་གདམས་པ།
སློབ་དཔོན་ཆེན་པོ་ཏེ་ལོ་པས། །རྔོན་པ་
1-1-51b
འཛིན་ན་ལ་གདམས་པ། །ལུས་ངག་ཡིད་གསུམ་མི་དགེ་འགྱོད་པ་ཡིས། །མི་དགེ་སྤང་ཞིང་དགེ་བ་ཉམས་དུ་(སུ་)བླངས། །ཡིད་བཞིན་ནོར་བུ་གཙུག་གིས་གདུང་བ་འཛོམས། །སྐྱབས་སུ་འགྲོ་ཞིང་བྱང་ཆུབ་མཆོག་སེམས་བསྐྱེད། །བུ་ཆུང་ལྟར་གནས་འཛུབ་ཀྱིས་ཟླ་མཚན་བཞིན། །ཆུ་བོའི་རྒྱུན་བཞིན་དེ་ཉིད་གོམས་པ་ལས། །གཟུང་འཛིན་གཉིས་ཀྱི་ནགས་ཚལ་སྟུག་པོ་ནས། །མ་རིག་རྟོག་པའི་རི་དྭགས་རྒྱུ་བ་དག །ཉམས་མྱོང་ཡེ་ཤེས་རྟོགས་པའི་མདས། །བདེ་ཆེན་ཕྱག་རྒྱ་ཆེན་པོའི་ངང་དུ་བསྒྲལ། །ཉི་ཟླའི་འོད་དང་འོད་ཟེར་གཉིས་སུ་མེད། །དཔག་བསམ་ཤིང་དང་བུམ་པ་ཇི་བཞིན་དུའོ། །ཛྷི་ན་བྱང་ཆུབ་དཔལ་གྱི་རི་ལའོ། །
༄། །མུ་སྟེགས་སྟོན་པ་མན་ཏྲི་ལ་གདམས་པ།
སློབ་དཔོན་ཆེན་པོ་ཏེ་ལོ་པས། །མན་ཏྲི་ཛྷེ་ན་ར་ལྔ་སྟེ། །མུ་སྟེགས་སྟོན་པ་མན་ཏྲི་ཡི། །ཆད་པར་ལྟ་བ་གསལ་བའི་ཕྱིར། །དེའི་དོན་དུ་གསུངས་པ་འདི། །ཏེ་ལོ་རྣམ་པ་བཞི་རུ་གསུངས། །ཕྱི་དང་ནང་དང་གསང་བ་དང་། །ཁོ་ན་ཉིད་དང་རྣམ་པ་བཞི། །རྒྱུ་འབྲས་དངོས་སུ་བསྟན་པ་ལས། །ཕྱིའི་རྒྱུ་འབྲས་བཤད་ནས་ནི། །ནང་གི་རྒྱུ་འབྲས་འདི་ལྟ་སྟེ། །རྡོ་རྗེ་ལུས་ཀྱི་གནས་ལུགས་ལ། །ལུས་ཀྱི་རྒྱུ་ནི་རྩ་ཡིན་ཏེ། །ངག་ནི་ཡི་གེ་སེམས་ཐིག་ལེ། །གསུམ་ལ་ཁྱབ་པ་རླུང་ཡིན་ནོ། །དེ་བཞིན་རྒྱུ་དང་འབྲས་བུ་ནི། །མངོན་སུམ་སྟོན་པར་བྱེད་པ་ལ། །གནད་ནི་རྣམ་པ་བཞི་ཡིན་ཏེ། །ལུས་དང་རྩ་དང་ཡུལ་དུ་དམིགས། །རླུང་གི་གནད་དང་བཞི་རུ་འདུས། །དང་པོ་བཅའ་ཐབས་ལུས་ཀྱི་གནད། །རྐང་པ་རྡོ་རྗེ་སྐྱིལ་མོ་དཀྲུང་། །བསམ་གཏན་ཡན་ལག་ལྔ་སྦྱོར་བས། །རང་བཞིན་མེད་པའི་ལྷ་རུ་བསྒོམ། །དེ་ནི་ལུས་ཀྱི་གནད་ཡིན་ནོ། །རྩའི་གནད་ནི་འདི་ལྟ་སྟེ། །འཁོར་ལོ་བཞི་ནི་གནས་བཞི་རུ། །སྐད་ཅིག་གིས་ནི་འཁོར་ལོ་བཞི། །རྣམ་པ་ཙམ་རེ་
1-1-52a
ཝལ་གྱིས་བསམ། །རྩ་གསུམ་མཚན་ཉིད་བསྟན་པ་ནི། །གསལ་བར་བསྒོམ་ཞིང་ལམ་དུ་བྱ། །དེ་ནི་རྩའི་གནད་ཡིན་ནོ། །དམིགས་པའི་རྟེན་ནི་འདི་ལྟ་སྟེ། །སྤྱི་བོ་བདེ་ཆེན་འཁོར་ལོ་ནས། །ཚངས་བུག་ཧཾ་དཀར་མགོ་ཐུར་ལྟ། །ལྟེ་འོག་སོར་བཞི་བཅལ་བ་ན། །ཤེས་རབ་ཨ་དམར་གྱེན་ལ་ལྟ། །དེ་ནས་སྦྱོར་བཞི་རླུང་བསྒོམས་པས། །ཨ་ལས་མེ་འབར་ཧཱི་ལ་རེག །བྱང་ཆུབ་སེམས་ནི་ཨ་ལ་ཐིམ། །དེ་ལྟར་བསྒོམས་པར་གྱུར་པ་ལས། །འབྲས་བུ་སྐྱེ་བའི་རིམ་པ་ནི། །རྩ་ཁ་བྱེ་བས་རྩ་མདུད་གྲོལ། །ཐིག་ལེ་འཕེལ་ཞིང་བདེ་བ་རྒྱས། །བདེ་བའི་ངོ་བོ་མི་རྟོག་པ། །དེ་གསུམ་དབྱེར་མེད་ལྷན་ཅིག་སྐྱེས། །འདུ་འབྲལ་མེད་པ་ཆོས་སྐུར་འབར། །ནང་གི་རྒྱུ་འབྲས་རྟེན་འབྲེལ་ནི། །དངོས་སུ་བསྟན་པའི་གདམས་ངག་གོ། །གསང་བའི་རྒྱུ་འབྲས་རྟེན་འབྲེལ་ནི། །དངོས་སུ་བསྟན་པའི་གདམས་ངག་ལ། །གནད་ནི་བདུན་དུ་ཤེས་པར་བྱ། །བྱང་ཆུབ་སེམས་ཀྱི་བདེ་བ་ནི། །དབབ་སྐྱིལ་ཟློག་འཛིན་དྲན་པ་དང་། །དགྲམ་དང་ཁབ་བྱང་བཞག་པ་རྣམས། །ངོ་ཕྲོད་བླ་མའི་ཞལ་ལས་ཤེས། །དེ་ཁོ་ན་ཉིད་ཀྱི་རྒྱུ་འབྲས་ལ། །རྒྱུ་ནི་དངོས་པོའི་གནས་ལུགས་ལ། །མཚན་ལྡན་བླ་མའི་བྱིན་བརླབས་ཀྱིས། །སྐད་ཅིག་ཉིད་ལ་ཆོས་སྐུར་འཆར། །རྒྱུ་འབྲས་དངོས་སུ་བསྟན་པའོ། །མུ་སྟེགས་སྟོན་པ་ལ་གདམས་པའོ། །
༄། །མཐུ་མཁན་ལ་གདམས་པ།
སློབ་དཔོན་ཆེན་པོ་ཏེ་ལོ་པས། མཐུའ་མཁན་ལ་གདམས་པ། ལྷན་ཅིག་སྐྱེས་པའི་ཡེ་ཤེས་ཅན། །རེ་དོགས་མཐར་འཛིན་དུག་གི་བཀྲེ་ཤིང་གིས། །ལྷན་ཅིག་སྐྱེས་པའི་བདེ་བ་ཐོབ་འདོད་པ། །ལོ་འདབ་སྟེང་དུ་རྡོ་རྗེ་སྐྱིལ་དཀྲུང་ཆོས། །ནོར་བུ་རིན་ཆེན་ལྗོན་ཤིང་རྩེ་དང་དབུས། །སྤྲེའུ་ཡི་སྤྱན་འབྲས་གྱེན་ལ་བཟློག་པར་
1-1-52b
བྱ། །གཟུང་འཛིན་རང་གྲོལ་དོན་གྱི་སྙིང་པོ་ལྟོས། །ལས་ཟིན་སྐྱེས་བུ་མཁས་པ་ཇི་བཞིན་དུ། །ལུས་ངག་ཡིད་གསུམ་སྙུག་མའི་ངང་དུ་ཞོག །མེ་ལོང་གཡའ་དག་བུ་རམ་ནོར་བུ་བཞིན། །ཅེས་ཏེ་ལོ་པས་གསུངས་པས། མཐུ་མཁན་གྱིས་ལམ་གྱི་མཆོག་གྱུར་བླ་མའི་བྱིན་བརླབས་ཀྱི། ཉོན་མོངས་དུག་ལ་སྔགས་བཞིན་ཆོས་ཀྱི་སྐུ། །ནམ་མཁའི་ཀློང་ན་ནོར་བུའི་འོད་ཟེར་འབར། །འགྲོ་དྲུག་སེམས་ཅན་བུ་བཞིན་ཅིས་མི་བཟུང་། །ཅེས་ཟེར་ནས་གྲོལ་ནས་རྡོ་རྗེའི་སྐུ་ཐོབ་པ། །
༄། །གླུ་མཁན་དབྱངས་མཁན་ལ་གདམས་པ།
ཉི་མ་ཨ་མི་ཙུན་དྷའི་གླིང་། །སློབ་དཔོན་ཆེན་པོ་ཏེ་ལོ་པས། །གླུ་མཁན་དབྱངས་མཁན་ལ་གདམས་པ། །གང་ཚེ་ལྟ་བ་མཁའ་ལྟར་དག་པ་ལ། །གྲུབ་མཐའ་རྟོག་པ་སྣ་ཚོགས་སྤྲིན་འདུས་ཀྱང་། །བརྗོད་མེད་ངག་གི་འབྲུག་སྒྲ་སྒྲོགས་པར་བྱོས། །མི་གནས་བདེ་ཆེན་ཡེ་ཤེས་རང་ལུགས་ཞོག །བསྒོམས་པ་ཆོས་རྣམས་ཀུན་དང་རོ་ཅིག་(གཅིག་)པ། །ཆུ་ཕྲན་རྒྱ་མཚོ་ཆེན་པོར་ཐིམ་པ་བཞིན། །རང་བྱུང་རང་བཞིན་སྣ་ཚོགས་ཆོས་ཉིད་ཅིག །དབྱེར་མི་ཕྱེད་པས་རྡོ་རྗེ་ལྟ་བུའི་ངང་། །སྤྱོད་པ་རང་བྱུང་ཚོགས་དྲུག་ལྷུག་པ་ཉིད། །བུ་ཆུང་སྨྱོན་པ་རྡོལ་བའི་སྤྱོད་པ་བཞིན། །སྣང་སྲིད་ཆོས་ལ་སྤང་བླང་མེད་པའི། །ཞེན་མེད་སྒྱུ་མ་ལྟ་བུར་སྤྱད། །ཉམས་མྱོང་དྲི་མེད་བདེ་སྟོང་རྒྱུན་ཆད་མེད། །མི་རྟོག་མི་དམིགས་ཆུ་བོའི་རྒྱུན་བཞིན་དུ། །ལུས་སེམས་སྣང་བ་ཐ་དད་མེད་པའི་དོན། །དྲི་མེད་ལྷུན་གྲུབ་རྟོག་(རྟོགས་)པའི་རྩོལ་བ་མེད། །འབྲས་བུ་རང་གྲོལ་འཁོར་འདས་དབྱེར་མི་ཕྱེད། །སྐུ་གསུམ་ལོགས་སུ་མེད་པ་རང་གི་སེམས། །ཡོན་ཏན་འཕྲིན་ལས་བྱང་ཆུབ་སེམས་ཀྱིས་འབྱུང་། །རྩོལ་མེད་གཏེར་ཆེན་མི་ཟད་འཁོར་ལོར་འཆར། །འདི་དག་མཐར་ཐུག་ཆོས་རྣམས་ཀུན་གྱི་བཅུད། །
1-1-53a
བདུད་རྩིའི་ཆུ་རྒྱུན་དབྱངས་ལྡན་བརྗོད་མེད་པ། །རྣལ་འབྱོར་ཁྱོད་ལ་ཏེ་ལོ་ངས་བཤད་གང་། །རང་རིག་རང་ལ་མཚོན་ཏེ་ཤེས་པར་བྱོས། །བླ་མའི་བྱིན་རླབས་བདེ་ཆེན་ཉི་མའི་འོད། །ཤར་གྱུར་མུན་སེལ་བློའི་པདྨ་ཕྱེ། །སྐལ་ལྡན་ཁྱོད་ཀྱིས་དེ་ལྟར་ཤེས་གྱིས་ལ། །ཏེ་ལོ་ང་ཡིས་ཅི་ཡང་བསྟན་དུ་མེད། །ཅེས་གདམས་པས་སོ། །
༄། །སྙན་རྒྱུད་ཀྱི་གདམས་པ།
དེ་ལ་ལྟ་བ་གཉིས་སུ་མེད་པར་གཏན་ལ་དབབ་པ་དང་། སྒོམ་པ་ཡོངས་སུ་མེད་པར་ཉམས་སུ་བླང་བ་དང་། སྤྱོད་པ་རང་བྱུང་ཚོགས་དྲུག་ལྷུག་པར་གཞག་པ་དང་། འབྲས་བུ་ལྷུན་གྲུབ་རེ་དོགས་མེད་པར་གཏན་ལ་དབབ་པའོ། །དང་པོ་ལ་གསུམ་སྟེ། ངོ་བོ་གཉིས་སུ་མེད་པ། རང་བཞིན་སྟོང་པ་ཉིད། མཚན་ཉིད་འགག་པ་མེད་པའོ། །གཉིས་པ་ལ་བཞག་ཐབས་རྣམ་པ་གསུམ་ལ་བརྟེན་ནས། རང་བྱུང་གི་ཡེ་ཤེས་ངོ་བོ་བཟུང་བའོ། །བཞག་ཐབས་རྣམ་པ་གསུམ་ནི། རྣམ་རྟོག་རང་སར་གྲོལ་བ་སྦྲུལ་མདུད་ལྟར་གཞག །རྣམ་རྟོག་འགྲོ་འོང་རྒྱུན་ཆད་མེད་པ་ཆུའི་རྒྱུན་ཆད་པའི་རང་ཐག་ལྟར་གཞག །རིག་པ་འབད་རྩོལ་མེད་པ་རྟོགས་པ་ཅིག་གིས་ས་ཆོད་པ་བྱ་རྒོད་ནམ་མཁའ་ལ་ལྡིང་བ་ལྟར་གཞག་པའོ། །དེ་ལས་ཉམས་གསུམ་འཆར་བ་གསལ་ལ་རྟོག་པ་མེད་པ་མར་མེ་རླུང་གིས་མ་བསྐྱོད་པ་ལྟ་བུའི་ཉམས། གསལ་ལ་མཐའ་སངས་པ་སྟོན་ཀའི་ནམ་མཁའ་རྣམ་པར་དག་པ་ལྟ་བུའི་ཉམས། སྤང་བླང་མེད་པ་ཆུ་ནང་གི་ཟླ་བ་ལྟ་བུའི་ཉམས་འཆར་རོ། །སྤྱོད་པ་ལ་གསུམ་སྟེ། ཞེ་སྡང་ལམ་དུ་སློངས་པ་ལ་སྙིང་རྗེ་ཀུན་ཏུ་སྤྱོད་པ་དང་། འདོད་ཆགས་ལམ་དུ་སློངས་པ་ལ་བདེ་བའི་ཀུན་ཏུ་སྤྱོད་པ་དང་། གཏི་མུག་རང་སར་གྲོལ་བ་དབྱེར་མེད་ལྷན་ཅིག་སྐྱེས་པ་བདེ་ཆེན་དུ་སྤྱོད་པའོ། །འབྲས་བུ་ནི་རེ་དོགས་མེད་པར་སེམས་རང་བཞིན་གྱིས་སྟོང་པ་འོད་གསལ་དུ་རྟོགས་པ་
1-1-53b
ཆོས་སྐུ། དེའི་ངོ་བོ་ཟག་པ་མེད་པ་ངོ་བོ་ཉིད་ཀྱི་སྐུ། དེ་ཉིད་ཀྱི་ངང་ལ་ཐུགས་རྗེ་ཆེན་པོ་མ་འགགས་པར་ཤར་བ་སྤྲུལ་པའི་སྐུའོ། །གཞི་ལམ་འབྲས་བུ་ལྟ་བསྒོམ་སྤྱོད་པའི་གདམ་ངག་དབྱངས་ལྡན་བཀུག་ཅེས་སོ། །རྗེ་བཙུན་ཆེན་པོ་ཏེ་ལོ་པའི་སྙན་རྒྱུད་ཀྱི་གདམས་པའོ། །

